മാനവസേവയാണ് ഈശ്വരസേവയെന്നും, ജീവകാരുണ്യം നമ്മുടെ ഔദാര്യമല്ല, ഓരോരുത്തരുടേയും കടമയാണ് എന്ന ചിന്തയിൽ നിന്നാണ് മാനവസേവാ സമിതിയുടെ പിറവി. കഴിഞ്ഞ കാൽ നൂറ്റാണ്ടുകളായി ധാർമിക - ജീവകാരുണ്യ മേഖലയിൽ വ്യത്യസ്തമായ പന്ഥാവിലൂടെ യാത്രചെയ്യുവാൻ ആഗ്രഹിക്കുന്ന ഒരുപിടിയാളുകളുടെ ഒത്തുചേരൽ. ആർഷഭാരത സംസ്കാരത്തേയും, പൈതൃകത്തേയും നെഞ്ചോട് ചേർത്ത്, പരമപവിത്രമായ ജന്മലക്ഷ്യത്തിലേക്ക് ഓരോ ജീവനെയും എത്തിക്കുന്നതിനായുള്ള ഒരു കൂട്ടായ്മ... ഇവിടെ ധാർമിക ജീവകാരുണ്യ പ്രവർത്തനങ്ങൾ ഹൃദയതാളമാവുന്നു.

അറിവിന്റെ ഉറവിടമായ ഭാരതം ലോകത്തിൻ്റെ ഹൃദയമാണല്ലോ? മനുഷ്യരാശിയുടെ മാത്രമല്ല പ്രപഞ്ചത്തിലെ സർവ്വചരാചരങ്ങളും സുഖമായി ജീവിക്കുവാൻ ഉതകുന്ന ഒരു ജീവിതക്രമം, അത് ഭാരതത്തിൻ്റെ മാത്രം സവിശേഷതയാണ്. നമ്മുടെ വഴിത്താരയിൽ നിന്നും വേറിട്ടു സഞ്ചരിക്കുന്നവരെ പോലും ഹൃദയത്തോട് ചേർത്തുപിടിച്ച് ശാശ്വത ശാന്തിയിലേക്ക് നയിക്കുകയെന്ന കർത്തവ്യം നാം അനസ്യൂതം തുടർന്നുകൊണ്ടിരിക്കുന്നു. എന്നാൽ സമൂഹത്തെ മുഴുവൻ ഗ്രസിച്ചിരിക്കുന്ന ധർമ്മക്ഷയം മനുഷ്യരാശിയുടെ നിലനിൽപ്പിനു വരെ ഭീഷണി ഉയർത്തുന്നു.

"ക്ഷേത്രങ്ങൾ സാധനാകേന്ദ്രങ്ങളാവണം" എന്ന ആപ്തവാക്യം അന്വർത്ഥമാക്കുന്ന മാതൃകാ ക്ഷേത്ര സങ്കേതങ്ങൾ, ഇവിടെ ഈശ്വരവിശ്വാസത്തിനപ്പുറത്ത് ഈശ്വരാനുഭവത്തിലേക്ക് ഭക്തരെ നയിക്കുന്നതിനുള്ള കർമ്മപദ്ധതികൾ ആവിഷ്കരിച്ച് നടപ്പാക്കുന്നു...!

അയിരവല്ലിക്കാവ് ദേവിക്ഷേത്രം

"വെണ്ണക്കൽ വിഗ്രഹ പ്രതിഷ്ഠ"യുള്ള കേരളത്തിലെ ഏകക്ഷേത്രം, മംഗല്യ- സന്താനഭാഗ്യത്തിന് ഖ്യാതിനേടി വിരാജിക്കുന്നു, ആദിപരാശക്തിയായി കുടികൊള്ളുന്ന അമ്മയുടെ അനുഗ്രഹ കൃപാകടാക്ഷം തൊട്ടറിയുവാൻ എല്ലാമലയാളമാസവും ആദ്യഞായറാഴ്ചകളിൽ രാവിലെ എട്ടുമണിമുതൽ ആർഷവിദ്യാപീഠം ആചാര്യന്മാരുടെയും സാധകരുടെയും കാർമികത്വത്തിൽ "ശക്തിസാധനായജ്ഞം" നടക്കുന്നു, ഇതിൽ പങ്കെടുക്കുന്നവരുടെ അനുഭവസാക്ഷ്യത്തിലൂടെ ഭക്തരുടെ ഹൃദയത്തിൽ അമ്മ ചിരപ്രതിഷ്ഠിതയാകുന്നു....!!